ବସ୍ତାରୁ ନାବାଳକର ମୃତଦେହ ଉଦ୍ଧାର, କାଲିଠାରୁ ଥିଲେ ନିଖୋଜ

ବସ୍ତାରୁ ମିଳିଲା ନିଖୋଜ ନାବାଳକଙ୍କ ମୃତଦେହ । ଏଭଳି ଏକ ଅଭାବନୀୟ ଘଟଣା କେନ୍ଦୁଝର ଜିଲ୍ଲା ଗୋପୀନାଥପୁର ଗାଁରେ ଘଟିଛି । ନାବାଳକଙ୍କ ବୟସ ୯ ବର୍ଷ ବୋଲି ଜଣାପଡିଛି ।  ଏପରି ଘଟଣା ସାରା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । 

ସୂଚନା ଅନୁଯାୟୀ ଗାଁର ମୃତ ନାବାଳକ ପବନା ମୁଣ୍ଡା ଗତକାଲି ସନ୍ଧ୍ୟାରୁ ନିଖୋଜ ଥିଲେ। ପରିବାର ଲୋକେ ଚାରିଆଡ଼େ ଖୋଜାଖୋଜି କରିଥିଲେ ମଧ୍ୟ ପାଇନଥିଲେ। ଆଜି ସକାଳେ ଗାଁର ଗୌରାଙ୍ଗ ପାତ୍ରଙ୍କ ଘର ସମ୍ମୁଖରେ ଏକ ମୁହଁ ବନ୍ଧା ହୋଇଥିବା ଅଖା ବସ୍ତା ପଡ଼ିଥିଲା। ଏନେଇ ଗୌରାଙ୍ଗଙ୍କର ସନ୍ଦେହ ହୋଇଥିଲା। ସେ ସଙ୍ଗେ ସଙ୍ଗେ ରିମୁଳି ଥାନାକୁ ଘଟଣା ସଂପର୍କରେ ଜଣାଇଥିଲେ। 

ରିମୁଳି ଥାନା ଅଧିକାରୀ ଘଟଣାସ୍ଥଳରେ ପହଞ୍ଚି ବସ୍ତାଟିକୁ ଖୋଲିଥିଲେ। ଏହାପରେ ବସ୍ତାରୁ ନିଖୋଜ ନାବାଳକର ମୃତଦେହ ମିଳିଥିଲା। ପୁଲିସ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ଅନ୍ୟପକ୍ଷରେ ପୁଅକୁ କିଏ ହତ୍ୟା କରି ବସ୍ତାରେ ପୂରାଇ ଫିଙ୍ଗି ଦେଇଛି ବୋଲି ପରିବାର ଲୋକ ଥାନାରେ ଅଭିଯୋଗ କରିଛନ୍ତି । ଘଟଣାକୁ ନେଇ ପୁଲିସ ତଦନ୍ତ ଆରମ୍ଭ କରିଛି । ତେବେ ଏହା ପୂର୍ବ ଶତ୍ରୁତା କି ପାରିବାରିକ ଶତ୍ରୁତା ତାହା ଜଣାପଡିନାହିଁ ।